等待

這兩個星期過得好快，當中等待嘅時間又覺得好漫長，無記性嘅我，好想記低發生過嘅事..........
其實近排已發現佢成日進出貓沙盆抓沙，但因為Mui有時會連Bebe去完都會走入去抓，只以為佢貪玩，8月13日晚，見到MuiMui响貓沙上嘅尿中有些粉紅，就知道大事不妙，第二天一早就帶佢去睇醫生．

8月14日（日），早上帶MuiMui去睇醫生，醫生要同佢做好多檢查，驗血，驗尿，種菌，照X Ray等，要放低五點半黎接，而這天是朋友寶貝生日party，係呢段空檔就帶咗蝦條去玩咗一陣．

到返去接呀妹時，醫生就講檢查結果是MuiMui膀胱有黑影，腎也有一粒黑影，應該係石，所以要做膀胱手術，我同老爹一時間未有作出反應，醫生就講咗可試另外兩個提議，一是在膀胱插喉貫水入去，嘗試將石仔沖出來，這個也要做麻醉但唔一定成功，二是吃醫生糧，試著將石仔溶細一點，希望能經尿液出來，但講明這樣作用不大，那晚，我地就帶咗呀Mui返屋企，晚上再同老爹商量過後決定做呢個手術．我地將葯放係佢好鐘意嘅糧，佢lam到就唔再食了．
cd糧唔食，醫生開消炎丸，膀胱補充濟，打了膀胱加強針，消炎丸，類固醇，益生菌

8月15日（一），早上打電話去問有關手術詳情，得到的回覆是昨天的醫生每星期只返一天，另一個醫生就說這兩天約滿了，反正要等種菌報告多等兩三天．係呢段時間我作出另一決定，帶MuiMui去睇多一個醫生，叫診所fax晒資料去新醫生到，放工趕回家接MuiMui去九龍另一診所，做了超聲波檢查後，醫生肯定的說係石，但需要再睇埋X Ray知道石的大細，才能肯定是否要做手術．亦解釋就算做了膀胱，一段時間後腎中的一粒也有機會流入膀胱．
S/O乾糧食少少

8月16日（二），放工去攞X Ray 片再過海比醫生睇，醫生講得很詳細，認為做手術是最好的了，但同樣認為睇咗種菌報告後才做，因為若有菌在內，做手術會有危險．

8月19日（五），呢幾日每天打電話去問，終於今日等到了種菌報告，結果係冇菌，定了21日做手術

8月20日（六），晚餐後開始禁食
8月21日（日），早上10時左右開始禁水，五點去到診所，醫生講解了手術資料，亦再照了一次超聲波，看看有沒有奇蹟石仔會在呢幾日內痾了出來，當然石仔還在，六點離開了診所，一直在外流連，九點接到診所來電可於十點接回MuiMui，去到診所見到MuiMui時已經清醒了，而且仲好精令，還要等見醫生，到十一點幾，醫生才有時間見我們，比我睇由MuiMui膀胱攞出來的石仔，有好幾粒，有點像未經打磨的水晶，拮手呢，落刀前唧尿時曾走出兩粒小小的，醫生再照了一次X Ray，看看是否好彩不用落刀，當然也没有這麼理想，那天晚上，MuiMui回到家但沒有吃東西．
S/O乾糧，S/O濕糧唔食，醫生開消炎丸

8月22日（一），早上比野佢唔食，我地要返工，又怕MuiMui會lam傷口，就將佢困籠，放了水樽和糧入籠，估唔到返黎時發覺有三隻指甲脫了出來，剩下的都爆了，睇到心痛就再不敢困了，晚上開餐時間，佢左遙右擺地走埋黎，但就只是用鼻索，同樣係唔飲唔食，是否太痛呢？唯有用針筒餵，過程需然艱辛，但總算餵到．

8月23日（二），下午打電話比醫生講情況，醫生叫帶佢返去，去到診所再影超聲波，沒有腫，打了止痛針，回家問攞野食，每次MuiMui聽到開鑵頭的聲，就走埋黎，我地好開心咁開咗佢喜歡的鑵頭，發覺佢曾將糧含在口邊，但又吐出來，開另一鑵，反應一樣，開到第三鑵不同味道都是一樣的反應，只是不停的索及望住ｄ糧，最後都係動用針筒．

8月24日（三），同樣叫係索糧，完全唔用咀掂，而且開始行得很不穩，會向右邊跌低．

8月25日（四），打電話到診所將情況講低，醫生叫我再帶MuiMui返去，晚上我帶住拍低的片到診所給醫生看，當晚醫生看過片後，做了很多檢查，視覺，嗅覺，手腳神經，超聲波，驗血等後就很鄭重的同我地講，有機會係MuiMui對麻醉葯敏感，對神經做成了傷害，建議我第二日帶MuiMui去睇大平道的呂醫生，那一刻我還未意識到嚴重性，醫生再三提我這可能造成永久傷害，叫我第二天帶佢去，會寫介紹信refer過去，我才醒覺嚴重性，那晚帶住沈重心情同MuiMui返屋企，望住MuiMui，淚水再忍唔住．

8月26日（五），返到公司就等十點太平道診所開門打電話去，要求約時間睇呂醫生，對方要先睇病歷，托診所fax晒資料去等覆電話，11點左右呂醫生覆電，叫我帶MuiMui過去，佢會先搵另一位郭醫生睇MuiMui，當時有點失望，呂醫生太忙？約咗兩點半，好少請假的我寫低假紙就走，和條爸未夠兩點就去到診所，等到三點多終於見到郭醫生了，我又再將那段放在手機的短片給她看，佢做完一輪檢查，發覺MuiMui左手神經無反射，頭部有點側，行路不穩等，再將佢帶給呂醫生睇左一陣，十分鐘左右回來，就提出要同腦部照磁力共振，提到係神經的問題，有機會係本身有問題，而麻醉葯引發了出來，另外就是睇下有否腦瘤或癌，同埋會抽Ｄ野去化驗，我的問題是，再麻醉是否有危險和費用？醫生解釋了上一次已是一星期前（其實只是五日），而且用聞氣嘅方法會較安全，呢段時間又是等待............
四點等到五點幾打黎話開始麻醉，大約廿分鐘就可以，但又再等到七點半，醫生才再見我地，解釋MRI嘅結果，睇住那張一團一團的圖，好細小的頭，聽到醫生說沒有腫瘤未有癌時鬆了一口氣，但講到右下角的一張圖時，有一撻野說那是左邊的中耳，內有菌，應是中耳炎，或者是中耳炎令到佢一開口就好痛，所以唔飲唔食，已經抽了去驗，也抽了另一樣野去驗，要知道是甚麼菌，才知是否能用葯解決，否則就要在耳後開刀整走那些菌，建議MuiMui留院兩天，本來我反對留院，我怕佢唔食野，怕佢再爪脫甲，但醫生堅持而且答應明天會有姑娘覆我，若穩定就可出院．我地出去辦了手續，那時已差不多八點，八點至九點是探病時間，等到八點就上去睇MuiMui，她面壁呢，應該很驚吧，見到我地就一直lur我地，貓病房內有另一隻貓貓，主人來探時帶了鑵頭，還請MuiMui食，真神奇，MuiMui竟然lam，需然只是少少而且食到周圍都係，但是這幾天以來第一次見她開口食野，那一刻真係好開心，九點探病時間夠，要離開了，我同條爸吃了點東西就回家，這天真的很累．

8月27日（六），上午接到診所打電話來，MuiMui穩定可以接返屋企，約咗五點見醫生，五點四十五分見到醫生了，醫生說MuiMui需然食得唔多，但肯食野，開咗止痛液，抗生素，眼gel等就叫我地返屋企等種菌報告，三天左右，昨天忘記問的問題........
左手無反應是否也是這個原因？是，右中耳所以影響左手
除咗抽中耳的菌還抽咗咩？腦髓液，包住神經的水，睇下有冇發炎
呢ｄ症狀是否屬放神經科？是的，會影響神經線
我地接咗MuiMui回家，一到家就問攞野食，開咗幾鑵唔同味道的鑵頭，斷斷續續食了很久，lam晒ｄ汁，但食得唔多．
Recovery 糧唔食，醫生開咗抗生素，止痛液，眼gel，行路不穩會跌低，記得放乾糧位置，試過想跳但跳唔到

8月28日（日），同樣問攞野食，lam晒ｄ汁，但食得唔多，行路不穩會跌低
8月29日（一），同樣問攞野食，lam晒ｄ汁再分開好多次食，但食多咗，行路不穩會跌低

8月30日（二），今天打電話去診所問報告有未，得到回覆有了，但醫生休息，會叫醫生明天覆我，好心急，希望唔使開刀吧，今天開第一款鑵頭lam咗少少就唔食，開第二鑵就食多咗，希望明天有好消息吧